24 گھنٹوں میں 3 لاکھ سے زائد فلسطینی شمالی علاقوں میں پہنچ گئے

غزہ : غزہ میں چوبیس گھنٹوں کے دوران تین لاکھ سے زائد فلسطینی شمالی علاقوں میں پہنچ گئے. سڑکوں پر پیدل اور گاڑیوں سے سفر کرنے والوں کی قطاریں لگ گئیں۔ غزہ کے سرکاری میڈیا آفس کے مطابق تین لاکھ سے زائد فلسطینی الرشید اور صلاح الدین اسٹریٹس کے راستے غزہ اور شمالی گورنری میں واپس پہنچ چکے ہیں۔ میڈیا آفس نے کہاہے کہ واپس آنے والوں کے ساتھ ساتھ پہلے سے موجود لوگوں کیلئے فوری طور پر ایک لاکھ پینتیس ہزار خیموں کی ضرورت ہے۔ ان علاقوں میں اسرائیلی قابض فوج کی طرف سے تباہی 90 فیصد سے تجاوز کر گئی ہے۔
اقوام متحدہ نےکہا ہے کہ لوگ واپس آرہے ہیں لیکن کسی قسم کی سہولیات موجود نہیں ہیں۔ فوری طور پر پانی۔ خوراک اور سر چھپانے کیلئے سائبانوں کا انتظام کرنا ہوگا۔
ادھر فلسطینی ہلال احمر نے گھروں کو واپس آنے والے شہریوں پر زور دیا ہے کہ وہ شمالی غزہ میں جنگ کی باقیات سے دور رہیں۔