230 سے زائد عالمی تنظیموں کا اسرائیل کو ایف 35 کی برآمدات روکنے کا مطالبہ

لندن : 230 سے زائد عالمی این جی اوز نے اسرائیل کو ایف تھرٹی فائیو کی برآمدات روکنے کا مطالبہ کردیا۔ عالمی سول سوسائٹی کی تنظیموں نے مشترکہ خط میں لکھا ہے کہ اسرائیل کو تمام ایف تھرٹی فائیو کی برآمدات غیر قانونی ہیں۔ انہیں فوری طور پر روک دیا جائے۔ غزہ کی جنگ بندی نازک ہے اور اسرائیل مقبوضہ مغربی کنارے میں لڑاکا طیاروں کو استعمال کرسکتا ہے۔
ان میں وہ تنظیمیں بھی شامل ہیں جنہوں نے پانچ مختلف ممالک میں قانونی کارروائیاں شروع کر رکھی ہیں۔ خط میں کہاگیاہے کہ گزشتہ 16 ماہ کی تباہ کن صورتحال نے واضح کیا ہے کہ اسرائیل بین الاقوامی قوانین کی تعمیل کے لیے پرعزم نہیں ہے۔ ایف تھرٹی فائیو دینے والے ممالک بہت زیادہ شواہد کے باوجود ان طیاروں کو بین الاقوامی قانون کی سنگین خلاف ورزیوں کے لیے استعمال ہونے سے روکنے میں ناکام رہے ہیں۔ یہ خط متعلقہ ممالک کے وزرا کو بھیجا گیا ہے۔