عرب اور اسلامی ممالک کے محض بزدلانہ بیانات اور مذمتیں قابل قبول نہیں، حماس

غزہ : حماس نے کہا ہے کہ غزہ کیلئے عرب اور اسلامی ممالک کے محض بزدلانہ بیانات اور مذمتیں قابل قبول نہیں ہیں۔حماس نے ایک بیان میں کہاہے کہ یہ ناقابل فہم ہے کہ کسی حقیقی حمایت کے بغیر فلسطینی عوام کو اس المناک تصادم میں تنہا چھوڑا جائے جس سے چیلنج اور جرم کی شدت کو بڑھاوا مل رہاہے۔ حماس نے کہا کہ قابض ریاست کی مکمل حمایت کرکے امریکہ فلسطینیوں کے خلاف جارحیت میں برابر کا شریک ہے۔ یہ عالمی برادری پر ایک داغ ہےجو بڑے پیمانے پر قتل و غارت اور نسل کشی کی انتہائی گھناؤنی کارروائیوں کےسامنے بے بس اور خاموش کھڑی ہے۔ حماس نےکہا کہ تاریخ ان تمام لوگوں کا احتساب کرے گی جو خاموش رہے اور صیہونی جنگی مجرموں کے ساتھ گٹھ جوڑ کیا۔حماس نے عرب اور اسلامی ممالک کے رہنماؤں سے مطالبہ کیا کہ وہ اپنی تاریخی اور انسانی ذمہ داریاں ادا کریں اور اسرائیل پر جارحیت کو فوری طور پر روکنے کیلئے دباؤ ڈالیں۔