پاکستانیوں کو نوکریاں دینے کی یادداشت، ملائشیا، ترکی اور جاپان اہداف پورے کرنے میں ناکام

اسلام آباد : حکومت نے پاکستانی ورکرز کو بیرون ملک روزگار کی فراہمی اور مواقع کی تلاش کے لیے متحدہ عرب امارات سمیت پانچ ممالک کے ساتھ باہمی تعاون کی یادداشتوں پر دستخط کیے تھے تاہم کوششوں کے باوجود ان یادداشتوں کو معاہدوں کی شکل نہ دی جا سکی، ملائیشیا نے دو ہزار 336، جاپان نے 761 اور ترکی نے صرف 180 پاکستانیوں کو نوکریاں دیں، دستاویزات کے مطابق باہمی تعاون کی یادداشتوں کے تحت متحدہ عرب امارات اور عمان نے تو پاکستان کے ساتھ کیے ہوئے وعدوں کو پورا کیا اور تین لاکھ 20 ہزار میں سے تین لاکھ 17 ہزار 612 پاکستانی ورکرز کو ملازمتیں دیں،تاہم ملائیشیا، ترکی اور جاپان پاکستان کے ساتھ افرادی قوت کے حوالے سے یادداشتوں کے تحت طے شدہ ہدف پورا کرنے میں ناکام رہے اور صرف تین ہزار 277 افراد کو ملازمتیں دیں، وزارت سمندر پار پاکستانیز نے اس بات کی تصدیق کی ہے کہ کوشش کے باوجود ان یادداشتوں کو معاہدوں میں تبدیل نہیں کیا جا سکا تاہم وزارت کا کہنا ہے کہ وہ دنیا بھر میں پاکستانی ورکرز کے لیے مارکیٹ تلاش کرنے کے لیے سرتوڑ کوششیں کر رہے ہیں، اس سلسلے میں ایک کثیر الجہتی حکمت عملی تشکیل دی گئی ہے جس کے تحت روایتی جاب مارکیٹ سے ہٹ کر جرمنی، جاپان، کینیڈا، بلغاریہ، پرتگال اور بیلجئیم جیسے ممالک میں پاکستانی ورکرز کے لیے ملازمتوں کے مواقع پیدا کیے جا سکیں، اس حوالے سے ان ممالک کے ساتھ سفارتی سطح پر باہمی معاہدے اور یاداشتوں پر دستخط کرنے کی کوششیں کی جا رہی ہیں۔