عالمی بے حسی برقرار، رفح میں فلسطینیوں کا قتل عام، 24 گھنٹوں میں مزید 180 شہید

غزہ : عالمی بے حسی نے اسرائیل کے حوصلے بلند کردیئے ہیں۔ غزہ کے النصر اسپتال کو خالی کرنے کے لیے بطور دھمکی گرفتار طبی رکن کی لاش پیغام تحریر کرکے اسپتال کے باہر پھینک دی۔ دوسری طرف رفح میں اسرائیلی فوج کے حملوں میں شدت آگئی ہے۔ اسرائیلی فضائیہ نے شہری آبادی اور پناہ گزینوں کے کیمپوں کو نشانہ بنایا ہے جس میں 180 سے زائد فلسطینی شہید ہوگئے ہیں۔ رفح سے شہری جان بچانے کے لیے دوسرے علاقوں کی طرف نقل مکانی کررہے ہیں اطلاعات ہیں کہ نقل مکانی کی کوشش کرنے والے فلسطینیوں پر بھی اسرائیلی فوج نے حملے کیے ہیں شہدا کی مجموعی تعداد 28 ہزار 600 تک جاپہنچی ہے۔ رفح پر حملے کے اعلان کے بعد سے خان یونس میں پندرہ سے زائد اسرائیلی فوجی ہلاک ہوچکے ہیں۔ اسرائیلی فوج تین ماہ سے خان یونس میں کارروائیوں میں مصروف ہے شہر کو کھنڈر بناکر بھی اسرائیل خان یونس کا کنٹرول حاصل نہیں کرسک ہے۔ القسام اور الجہاد کے حملوں میں اب تک خان یونس میں دو سو سے زائد اسرائیلی فوجی مارے گئے ہیں۔