Raza Musani 
برطانوی دارالحکومت لندن کی میٹروپولیٹن پولیس نے کہا ہے کہ شمالی لندن میں "یہودی کمیونٹی ایمبولینس سروس” سے تعلق رکھنے والی چار ایمبولینسوں کو نذر آتش کیے جانے کے واقعے کی "یہود دشمنی پر مبنی نفرت” کے طور پر تحقیقات کر رہی ہے۔ لندن فائر بریگیڈ کو تقریباً صبح 1:40 گرین وچ ٹائم پر گولڈرز گرین علاقے میں کال موصول ہونے کے بعد "ہتسولا” کی چار ایمبولینسز کو جلتے ہوئے پایا۔ علاقے کی پولیس چیف سارہ جیکسن نے کہا کہ "ہم سی سی ٹی وی فوٹیج کا جائزہ لے رہے ہیں اور آن لائن پوسٹ کی گئی ویڈیوز سے بھی آگاہ ہیں۔ ابتدائی مرحلے میں، ہم تین مشتبہ افراد کی تلاش کر رہے ہیں۔”
احتیاطی تدابیر کے تحت آس پاس کے مکانات کو خالی کروا لیا گیا ہے اور سڑکیں اب بھی بند ہیں۔ پولیس نے بتایا کہ اس واقعے میں کوئی زخمی نہیں ہوا اور آگ مکمل طور پر بجھا دی گئی ہے۔ فائر بریگیڈ نے بھی اعلان کیا ہے کہ گاڑیوں کے اندر موجود کئی گیس سلنڈر پھٹ گئے جس سے قریبی رہائشی عمارت کی کھڑکیاں ٹوٹ گئیں۔ آگ پر قابو پانے کے لیے چھ فائر انجن اور تقریباً 40 فائر فائٹرز بھیجے گئے تھے اور بتایا گیا کہ صبح تین بجے کے بعد آگ پر قابو پا لیا گیا۔ ہتسولا ایک بڑی اور غیر منافع بخش یہودی رضاکار تنظیم ہے جو ہنگامی طبی خدمات اور مریضوں کو مفت میں ہسپتال منتقل کرنے کی سہولت فراہم کرتی ہے۔ یہ تنظیم 1979 سے شمالی لندن کے گولڈرز گرین میں رہائش پذیر افراد کو خدمات فراہم کر رہی ہے، جہاں بڑی تعداد میں یہودی آباد ہیں۔
