شاہ سلمان کی بیماری، بن سلمان سعودی عرب کا بادشاہ بن بیٹھا

ریاض: سعودی فرمانروا سلمان بن عبدالعزیز کی بیماری نے محمد بن سلمان کو سعودی عرب کا بے تاج بادشاہ بنادیا۔ اے ایف پی کی رپورٹ کے مطابق سعودی فرمانروا سلمان بن عبدالعزیز کی ریاض میں کسی غیر ملکی عہدیدار کے ساتھ آخری ملاقات مارچ 2020 میں ہوئی تھی جبکہ ان کا آخری بیرون ملک سفر جنوری 2020 میں سلطان قابوس کی موت پر تعزیت کے لیے عمان کا تھا۔ سلمان بن عبدالعزیز 86 برس کے ہوگئے ہیں اور ان کی صحت ملک کی اہم ذمہ داریوں کا بوجھ اُٹھانے میں رکاوٹ بن رہی ہے۔ جس کا فائدہ اٹھاکر 36 سالہ ولی عہد بن سلمان نے ریاست کی باگ ڈور اپنے ہاتھ میں لے لی ہے۔ وہ صدارتی اجلاسوں، عالمی وفود اور معززین کے استقبال سمیت مملکت کے تمام کاموں کی انجام دہی میں مصروف ہے ۔ وہ جون 2017 میں تخت کے وارث کے طور پر اپنی تقرری کے بعد سے ہی ڈی فیکٹو لیڈر تصور کیے جاتے ہیں لیکن رواں ماہ کے اوائل میں فرانسیسی صدر ایمانوئل میکرون سے ملاقات کی اور خلیج تعاون کونسل کے سربراہی اجلاس کی قیادت نے ان کی اہمیت کو بڑھا دیا ہے۔