Raza Musani 
اسلام آباد: پاکستان میں اسلامی جمہوریہ ایران کے سفیر رضا امیری مقدم نے پڑوسی ممالک کے ساتھ تعلقات مضبوط بنانے کی ایران کی پالیسی پر زور دیتے ہوئے اسلام آباد کے ساتھ زرعی میدان میں دوطرفہ تعاون بڑھانے کے لئے تہران کی آمادگی کا اعلان کیا ہے۔ رضا امیری مقدم نے وزیر صنعت و زراعت رانا تنویر حسین سے ملاقات میں کہا کہ ایرانی حکومت کی پالیسی اپنے پڑوسیوں بالخصوص پاکستان کے ساتھ تعلقات کو فروغ دینے پر مرکوز ہے۔
رانا تنویر حسین نے ایران پاکستان تعلقات کی سطح پر اطمینان کا اظہار کرتے ہوئے کہا کہ اسلام آباد کو اسلامی جمہوریہ ایران کے صدر کی میزبانی پر فخر ہوگا۔ انھوں نے کہا کہ پاکستان ، ایران کے ساتھ زرعی میدان سے متعلق شعبوں میں ہونے والے تعاون کے سمجھوتے کو حتمی شکل دینے کے لئے ضروری اقدامات تیزی سے انجام دے گا۔ ایران کے سفیر نے پاکستان میں حالیہ انتخابات کے کامیاب انعقاد کی مبارکباد دیتے ہوئے تہران میں رواں ماہ کے آخر میں ہونے والے شنگھائی تعاون تنظیم کے اجلاس میں شرکت کا دعوت نامہ پیش کیا۔ انھوں نے کہا کہ دونوں ملکوں کے درمیان دوستانہ اور دیرینہ تعلقات اور بہت سے مشترکہ روابط ، ہمہ گیر تعاون کو آگے بڑھانے کا ایک مضبوط عامل ہے۔
