Raza Musani 
جنیوا : ورلڈ سینٹرل کچن کے سربراہ جوز ایندریس نے اپنی سات رکنی ٹیم کی اسرائیلی ڈرون حملوں میں ہلاکت کے بعد اسرائیلی فوج کی طرف سے تحقیقات سامنے آنے پر سخت ترین موقف کا اظہار کیا ہے۔ ان کا کہنا ہے اسرائیلی فوج کی تحقیقات قبول نہیں ہے۔ اس سنگین ترین واقعے کی غیر جانبدارانہ تحقیقات کرائی جائیں۔ کیونکہ مجرم کو خود ہی تحقیقات کرنے کا حق نہیں ہو سکتا ہے۔ اسرائیلی فوج کی طرف سے کہا گیا ہے کہ یہ ایک سنگین غلطی تھی۔ اسرائیلی تحقیقات میں بتایا گیا ہے کہ گاڑی کی چھت پر موجود ایک شخص فائرنگ کر رہا تھا۔ جس سے شبہ ہوا کہ حماس نے گاڑی کو ‘ہائی جیک’ کر لیا ہے۔
اسرائیلی تحقیقات رپورٹ سے متعلق جب ورلڈ سینٹرل کچن’ کے سربراہ سے پوچھا گیا تو ان کا کہنا تھا یہ رپورٹ اسرائیلی ڈرون حملے میں ورلڈ سینٹرل کچن کے ہلاک ہونے والے سات مردوں اور عورتوں سے متعلق نہیں ہے۔ جوز ایندرس نے مزید کہا اسرائیل ہر اس چیز کو نشانہ بنا رہا ہے جو حرکت کرتی ہے۔ یہ جنگ دہشت گردی کے خلاف یا اسرائیلی حق دفاع کے لیے نہیں ہے بلکہ یہ انسانیت کے خلاف جنگ ہے۔
