اسرائیل کی ایران سے جنگ اور حماس کو غیر مسلح کرنے کی تیاری

تل ابیب : اسرائیلی وزیرِاعظم بنیامین نیتن یاہو نے فوجی کمانڈرز کو بتایا ہے کہ اسرائیل ایران کے ساتھ جنگ اور حماس کو غیر مسلح کرنے کی تیاری کر رہا ہے۔ اسرائیلی میڈیا کے مطابق اعلیٰ فوجی حکام کے اجلاس میں بنیامین نیتن یاہو نے کہا کہ موجودہ مہم کے بعد ایران پہلے سے زیادہ کمزور جبکہ اسرائیل مزید مضبوط ہوگا۔ انہوں نے ایرانی حکومت کے ممکنہ خاتمے سے متعلق کہا کہ کسی بھی جنگ کے آغاز میں اس کی کوئی ضمانت نہیں۔ تاہم شدید معاشی دباؤ ایسے حالات پیدا کررہا ہے جو نظام کے استحکام کو خطرے میں ڈال سکتے ہیں۔ نیتن یاہو کے مطابق ایران کی قیادت کو خدشہ ہےکہ معاشی بحران براہِ راست حکومتی بقا کو متاثر کر سکتا ہے، جیسا کہ ماضی میں احتجاجی مظاہروں میں دیکھا گیا۔ انہوں نے ایرانی جوہری پروگرام پر بات کرتے ہوئے کہا کہ امریکا کے صدر ڈونلڈ ٹرمپ کو یقین ہے کہ شدید معاشی دباؤ کے ذریعے زیرِ زمین محفوظ افزودہ مواد تک رسائی ممکن بنائی جا سکتی ہے۔ غزہ کے حوالے سے انہوں نے واضح کیا کہ اسرائیل حماس کی عسکری اور حکومتی صلاحیتوں کے خاتمے کے ہدف سے پیچھے نہیں ہٹے گا۔ ان کے مطابق اسرائیلی افواج غزہ کے پچاس فیصد سے زائد حصے پر سکیورٹی کنٹرول قائم کر چکی ہیں، جس سے کسی بھی علاقے میں کارروائی ممکن ہو گئی ہے۔