Raza Musani 
رام اللہ : اسرائیلی فوج نے مغربی کنارے میں اپنی جارحیت کو توسیع دیتے ہوئے 23 برس بعد اپنے ٹینک جنین میں داخل کردئے ہیں۔ اسرائیلی فوج ایک ماہ سے زائد عرصے سے جنین، طولکرم، طوباس اور نابلس میں کارروائیاں کررہی ہے۔ اسرائیلی حکام نے کہا ہے کہ صیہونی افواج، شین بیت اور بارڈر پولیس شمالی مغربی کنارے میں فلسطینیوں کی عسکری سرگرمیوں کو ناکام بنانے کے لیے کام جاری رکھے ہوئے ہیں۔ جنین میں ایک ٹینک ڈویژن بھی بھیج دیا گیا ہے۔
ادھر صیہونی وزیر دفاع کاٹز نے کہا کہ وزیر اعظم نیتن یاہو نے فوج کو مغربی کنارے میں کارروائیاں مزید سخت اور تیز کرنے کا کہہ دیا ہے۔ انہوں نے کہا کہ چالیس ہزار فلسطینیوں کو کیمپوں سے نکال دیا گیا ہے۔ رام اللہ میں قائم حقوق کی تنظیم الحق نے بین الاقومی مداخلت کا مطالبہ کردیا۔ ایک بیان میں تنظیم نے کہا کہ اسرائیلی ٹینکوں کی موجودگی سے ظاہر ہوتا ہے کہ اسرائیل شمالی مغربی کنارے میں وحشیانہ فوجی کارروائی کرنے جارہا ہے۔
