راشن کی تقسیم کا اسرائیلی منصوبہ خطرناک ہے، امدادی ادارے

غزہ : اقوام متحدہ اور انسانی ہمدردی کے گروپوں نے راشن کی تقسیم کی اسرائیلی اسکیم کو خطرناک قرار دیتے ہوئے اسے مسترد کردیا ہے۔ اقوام متحدہ اور غزہ میں کام کرنیوالی انسانی تنظیموں پر مشتمل ہیومینٹیرین کنٹری ٹیم نے کہا ہے کہ یہ پہلا موقع نہیں ہے کہ جب اسرائیلی حکام نے امداد کی تقسیم کا طریقہ کار تبدیل کرنے کی کوشش کی ہو۔ بیان میں اسرائیل کے منصوبے کو خطرناک قرار دیتے ہوئے کہا گیاہے کہ یہ منصوبہ شہریوں کو راشن جمع کرنے کے لیے عسکری علاقوں میں لے جائے گا۔ جس سے امدادی کارکنوں اور متاثرین کی زندگیوں کو خطرہ لاحق ہو گا۔ انہوں نے کہا کہ ہمیں دئے گئے منصوبے کے ڈیزائن کا مطلب یہ ہوگا کہ کم نقل وحرکت والے علاقوں اور سب سے زیادہ کمزور لوگوں سمیت غزہ کے بڑے حصے میں امداد نہیں پہنچ سکے گی۔