اسرائیلی ہٹ دھرمی اور جنگی جنون برقرار، رفح میں آپریشن نہ کرنے کی اپیل مسترد

واشنگٹن : امریکی وزیرخارجہ انٹونی بلنکن کی ایک بار پھر خطے سے خالی ہاتھ واپسی ہوئی ہے۔ بلنکن کے دورے میں جنگ بندی اور امداد کی بلا تعطل فراہمی کا کوئی فیصلہ نہ ہوسکا۔ اسرائیلی وزیراعظم نے رفح میں آپریشن نہ کرنے کی اپیل مسترد کردی۔ بنیامین نیتن یاہو نے کہا کہ حماس کے خاتمے کیلئے رفح آپریشن ضروری ہے۔ امریکا ساتھ دے یا نہ دے رفح میں زمینی کارروائی ضرور ہوگی۔ انٹونی بلنکن نے خبردار کیا تھا کہ رفح پر کسی بھی حملے سے اسرائیل پر زیادہ تنہائی مسلط ہوجائے گی اور طویل مدت میں اس کی سلامتی کو خطرہ لاحق ہوجائے گا۔ امریکی وزیر خارجہ انٹونی بلنکن نے گزشتہ روز تل ابیب میں اسرائیلی وزیر اعظم بینجمن نیتن یاہو سے ملاقات کی تھی۔ اس سے پہلے انہوں نے قطر۔ مصر اور سعودی عرب کا دورہ کیا۔ یہ اسرائیلی جارحیت شروع ہونے کے بعد بلنکن کا خطے کا چھٹا دورہ تھا۔