اسرائیلی جرائم اس کے فلسطینی سرزمین سے خاتمہ کا سبب بنیں گے، انصار اللہ

صنعا: انصار اللہ کے رہنما سید عبدالمالک بدرالدین الحوثی نے ایک بار پھر فلسطینی کاز کے لیے اپنے ملک کی حمایت کا اعادہ کیا ہے۔ انہوں نے کہاکہ اسرائیل غزہ میں ہر قسم کے جرائم کا ارتکاب کررہا ہے۔ الحوثی نے اس بات پر زور دیا کہ سانحہ بڑھ رہا ہے اور جرائم مزید وحشیانہ ہوتے جا رہے ہیں، اور غزہ میں جو کچھ ہو رہا ہے وہ انسانیت کے لیے شرمناک ہے۔ انہوں نے کہا کہ صیہونی وجود کے خطرات اور امریکی استعمار کے وحشیانہ رجحان سب کے لیے انتباہ ہے۔ انہوں نے اسرائیلی حکومت اور آباد کاروں سے کہا کہ جرائم پر خوش نہ ہوں وہ آپ کو ناگزیر معدومیت کے راستے پر تیزی سے لے جا رہے ہیں اور آپ کا فلسطینی سرزمین سے صفایا ہوجائے گا۔ انہوں نے زور دے کر کہا کہ نسل کشی کے ذریعے لوگوں کو کنٹرول، استعمار اور غلام بنانے کا وقت ختم ہو گیا۔ انہوں نے امریکہ کو مخاطب کرتے ہوئے خبردار کیا کہ اگر آپ جارحیت پر ڈٹے رہے تو اس کے نتائج بڑے اور خطرناک ہوں گے، اور آپ کے حامی اسرائیلی فوج کو ایک تاریخی اسکینڈل کا سامنا ہے۔