اسرائیلی سفاکانہ بمباری جاری، جبالیہ میں ایک ہی خاندان کے 52 افراد شہید

غزہ: جبالیہ میں فضائی حملوں میں ایک ہی خاندان کے 52 افراد شہید ہوگئے جبکہ خان یونس میں بھی 10 افراد لقمہ اجل بن گئے۔ غزہ میں اسرائیلی سفاکانہ بمباری جاری ہے۔ خان یونس میں اسرائیل نے پانچ رہائشی گھروں کو ڈرون سے نشانہ بنایا جس میں دس فلسطینی شہید بائیس زخمی اور درجنوں لاپتہ ہوگئے، دیرالبلاح میں بھی میزائل حملے میں متعدد شہادتیں ہوئیں اور کئی افراد زخمی ہوئے۔ نصیرات کیمپ کو متعدد بار نشانہ بنایا گیا ہے جہاں پانچ شہادتیں ہوئیں۔خان یونس میں اسرائیلی حملے میں شہید ہونے والے ایک سو گیارہ فلسطینیوں کی اجتماعی قبر میں تدفین کردی گئی۔
غزہ میں صیہونی مظالم سے شہید فلسطینیوں کی مجموعی تعداد 15 ہزار سے تجاوز کر گئی ، شہدا میں 6 ہزار سے زائد بچے اور 3600 خواتین شامل ہیں جبکہ 33 ہزار سے زائد زخمی ہوئے ہیں۔
صیہونی فوج نے مغربی کنارے میں تباہی مچادی۔ صبح سویرے صیہونی فوج ایک بار پھر مقبوضہ مغربی کنارے میں گھس گئی۔ طولکرم، قلقیلیہ سمیت کئی شہروں میں چھاپے مارے۔ کارروائیوں کے دوران ایک فلسطینی شہید اور کئی زخمی ہوگئے.