Raza Musani 
لندن : انسانی حقوق کے ادارے ہیومین رائٹس واچ نے کہا ہے کہ اسرائیلی فوج نے غزہ میں اسپتالوں پر قبضہ کرکے مریضوں کے خلاف جنگی جرائم کا ارتکاب کیا۔ ہیومین رائٹس واچ نے کہاہے کہ اسرائیلی فوج بجلی، پانی، خوراک اور ادویات کی فراہمی سے انکار کر کے چوراسی فلسطینی مریضوں کی موت اور غیر ضروری تکلیف کا باعث بنی۔ تین اسپتالوں کے عینی شاہدین نے بتایا کہ فوجیوں نے شہریوں کو گولیوں کا نشانہ بنایا۔ بدسلوکی کی اور طبی عملے اور مریضوں کو زبردستی بے گھر کیا۔ فوجیوں نے جان بوجھ کر طبی سہولیات اور آلات کو نشانہ بنایا۔ یہ اقدامات جنگی جرائم کے مترادف ہیں۔ ہیومین رائٹس واچ کی یہ رپورٹ نو مریضوں اور دو ہیلتھ کیئر ورکرز کے انٹرویوز پر مبنی ہے۔ جنہوں نے الشفا میڈیکل کمپلیکس ۔ کمال عدوان ہسپتال اور ناصر میڈیکل کمپلیکس پر اسرائیلی چھاپوں اور قبضوں کو دیکھا۔
