خطے میں اسرائیلی جارحیت ختم کی جائے، سعودیہ چین، ایران

تہران: ایران، چین اور سعودی عرب نے تہران میں مشترکہ اجلاس میں فلسطین، لبنان اور شام پر اسرائیلی جارحیت کے فوری خاتمے کا مطالبہ کیا۔
تہران میں ایران، چین اور سعودی عرب کی سہ فریقی کمیٹی کا تیسرا اجلاس بیجنگ معاہدے کی پیشرفت کا جائزہ لینے کے لیے منعقد ہوا۔ اجلاس میں ایرانی اور سعودی وفود نے بیجنگ معاہدے پر مکمل عملدرآمد اور ہمسائیگی کے اصولوں کے فروغ کے عزم کی تجدید کی۔ تینوں ممالک نے فلسطین، لبنان اور شام پر جاری اسرائیلی جارحیت کے فوری خاتمے کا مطالبہ کیا اور بڑھتی ہوئی علاقائی کشیدگی پر گہری تشویش ظاہر کی۔ تینوں ممالک نے علاقائی خودمختاری اور امن کے اصولوں پر مکمل عملدرآمد پر زور دیا۔
شرکاء نے ایران کی خودمختاری اور سرحدی سالمیت کی خلاف ورزیوں کی مذمت کرتے ہوئے کہا کہ ایسے اقدامات علاقائی استحکام کے لیے خطرناک ہیں۔