Raza Musani 
غزہ :غزہ پر اسرائیلی فوج کی جارحیت سو روز سے جاری ہے۔ تازہ حملوں میں مزید ایک سو نوے فلسطینی شہید ہوگئے۔ غزہ میں سو روز سے جاری مظالم کا سلسلہ تھمنے کا نام نہیں لے رہا ہے۔ اسرائیلی فوج نے دیر البلح، المغازی، رفح اور خان یونس میں مزید ایک سو نوے فلسطینیوں کو شہید کردیا ہے۔ شہدا کی مجموعی تعداد چوبیس ہزار سے بڑھ گئی ہے۔ فلسطینی وزارت صحت کے مطابق شہدا کی تعداد کئی زیادہ ہوسکتی ہے۔شمالی غزہ میں اسرائیل نے تقریباً زیادہ تر شہر کو ملیا میٹ کردیا ہے۔ اب تک غزہ میں تین لاکھ سے زائد رہائشی یونٹس تباہ کیے جاچکے ہیں۔ شہر میں 35 اسپتالوں میں سے صرف تین کام کررہے ہیں جہاں ادویات کی شدید قلت ہے۔اسرائیلی ناکہ بندی کی وجہ سے شہر میں قحط کی صورتحال ہے۔غذائی قلت سے روزانہ تیس بچے دم توڑ رہے ہیں۔ حاملہ عورتوں کی اموات میں بھی واضح اضافہ ہوا ہے۔عالمی ادارے صحت نے غزہ کی صورتحال کو مایوس کن قرار دیتے ہوئے فوری طور پر عالمی امداد کا مطالبہ کیا ہے۔
