Raza Musani 
جدہ : سعودی وزیر خارجہ فیصل بن فرحان نے کہا ہے کہ رفح میں اسرائیل کی ممکنہ فوجی کارروائی کے خطرناک نتائج ہوں گے۔ جدہ میں اسلامی ممالک کی تنظیم او آئی سی کے اجلاس سے خطاب میں شہزادہ فیصل بن فرحان نے کہا کہ زیادہ سے زیادہ ممالک فوری جنگ بندی کا مطالبہ کر رہے ہیں اور ایک خودمختار فلسطینی ریاست کے قیام کا مطالبہ بھی زور پکڑ رہا ہے۔ انہوں نے کہا کہ ریاست کے قیام سے فلسطینی اپنے حقوق حاصل کر سکیں گے۔ محفوظ زندگی گزار سکیں گے اور اپنی منزل کا تعین خود کرسکیں گے۔ سعودی وزیر خارجہ نے فلسطینی پناہ گزینوں کے لیے اقوام متحدہ کے ادارے انروا کی حمایت پر بھی زور دیا اور ادارے کو تحلیل کرنے کی کوششوں کے خلاف خبردار کیا۔ انہوں نے کہا کہ ایسا کرنے سے غزہ میں شہریوں کی مشکلات میں مزید اضافہ ہوگا۔
