جنگ بندی کی قرارداد سے اسرائیل تلملا اٹھا، غزہ میں کارروائی روکنے سے انکار

تل ابیب : سلامتی کونسل میں غزہ جنگ بندی کی قرارداد کی منظوری پر اسرائیل تلملا اٹھا۔ اسرائیلی وزیراعظم نیتن یاہو نے سیکورٹی وفد کا دورہ امریکا منسوخ کردیا۔ نیتن یاہو کہتے ہیں امریکا اپنے موقف سے ہٹ گیا ہے۔ امریکا نے کہا ہے کہ اسرائیلی وفد کے دورے کی منسوخی افسوسناک ہے۔ اسرائیلی اپوزیشن رہنما کہتے ہیں کہ نیتن یاہو اپنی ناکامی چھپانے کی کوشش کررہے ہیں۔ جبکہ اسرائیلی وزیردفاع نے غزہ میں کارروائی روکنے سے انکار کردیا۔ یووگیلانٹ نے کہا امریکا کو بتادیں گے کہ اسرائیل ہر جگہ کارروائی کرے گا۔ تمام یرغمالیوں کی رہائی تک غزہ جنگ روکنے کی ہم پر کوئی اخلاقی ذمہ داری نہیں ہے۔ اسرائیلی وزیردفاع نے کہا حماس کے خلاف ان مقامات پر بھی کارروائی کریں گے جہاں اب تک نہیں کی۔ یووگیلانٹ نے کہا ہمیں غزہ میں فیصلہ کن فتح نہیں ملی،ہم لوگ غزہ کے شمال میں جنگ کے قریب ہیں۔ انہوں نے کہا غزہ میں اب بھی یر غمال بنائے گئے اسرائیلی موجود ہیں۔