اسرائیل کا یروشلم میں نیا فوجی ہیڈ کوارٹر قائم کرنے کا معاہدہ

تل ابیب: اسرائیلی وزارت دفاع اور یروشلم میونسپلٹی نے شہر میں ایک نیا فوجی ہیڈ کوارٹر قائم کرنے کا معاہدہ کرلیا۔
منصوبے کے تحت شہر کے داخلی راستے پر تیس منزلہ ملٹری کمپلیکس بنایا جائے گا جس میں وزارت دفاع کے دفاتر موجود ہوں گے۔ معاہدے میں فوجی اہلکاروں کی یروشلم منتقلی، ملٹری میوزیم بنانے اور متعلقہ رہائش کے قیام بھی شامل ہے۔ معاہدے پر وزیر دفاع اسرائیل کاٹز، وزارت دفاع کے ڈائریکٹر جنرل امیر بارم، یروشلم کے میئر موشے شیر اور یروشلم میونسپلٹی کی ڈائریکٹر جنرل ایریلا ریجوان نے دستخط کیے۔
وزارت دفاع کا کہنا ہے کہ ملٹری کالجز جو فی الحال ہرزلیہ کے قریب گلیلوٹ اڈے پر واقع ہیں، کو یروشلم منتقل کیا جائے گا۔
حماس رہنما محمود مرداوی نے کہا ہےکہ یہ منصوبہ شہر کی آبادیاتی خصوصیات کو تبدیل کرنے کی کوشش اور فلسطینی آبادی پر پھندا تنگ کرنے کے مترادف ہے۔