اسرائیل کی ماہ رمضان کے فوری بعد رفح میں زمینی آپریشن کی منصوبہ بندی

غزہ: اسرائیل نے سلامتی کونسل کی قرارداد پاؤں تلے روندتے ہوئے ماہ رمضان کے فوری بعد رفح میں زمینی آپریشن کی منصوبہ بندی کرلی۔ حملوں کے بعد غزہ سے فلسطینیوں کو بے دخل کیا جائے گا۔ اسرائیل مصر کو باضابطہ اطلاع دے گا۔ اسرائیلی وزیراعظم نیتن یاہو نے کہا ہے کہ سلامتی کونسل میں امریکی فیصلہ بہت زیادہ برا اقدام تھا۔ حماس کو جان لینا چاہیے کہ اسرائیل پر عالمی دباؤ کام نہیں کرےگا۔
جنگ بندی کے باوجود اسرائیل کے غزہ پر حملے جاری ہیں۔ رفح۔ خان یونس اور شمالی غزہ میں فضائی حملے اور گولہ باری سے چوبیس گھنٹوں میں ستر سے زائد فلسطینی شہید کردیئے گئے۔ شہداء کی تعداد بتیس ہزار پانچ سو تک پہنچ گئی۔ صیہونی فوجیوں نے غزہ کے ساحل پر سفید جھنڈا اٹھائے دو فلسطینیوں کو شہید کرکے لاشیں بلڈوزر کے ذریعے دفن کردیں۔ عالمی ادارہ خوراک کی غزہ میں ممکنہ قحط کے خطرے کی ایک بار پھر نشاندہی کی ہے۔ ڈبلیو ایچ او کے سربراہ ٹیڈروس اذانوم کا کہنا ہے کہ بھوک اور بیماری غزہ کی آبادی کو تباہ کر رہی ہے۔ اب فوری اور ٹھوس اقدام کی ضرورت ہے۔ خوراک اور ادویات کی ترسیل کو تیز کرنا اور صحت کی سہولیات کو تحفظ فراہم کرناہوگا۔