Raza Musani 
نیویارک: اقوام متحدہ کے سیکریٹری جنرل انتونیو گوتریس نے اسرائیل سے مقبوضہ فلسطینی سرزمین پر آبادکاری کی تمام سرگرمیاں فوری طور پر بند کرنے کا مطالبہ کردیا۔ اقوام متحدہ کے نائب ترجمان فرحان نے کہا کہ سیکرٹری جنرل آباد کاری کی منصوبہ بندی کے طریقہ کار میں ترمیم کے اسرائیلی فیصلے سے سخت پریشان ہیں۔ ان تبدیلیوں سے مشرقی یروشلم سمیت مقبوضہ مغربی کنارے میں آباد کاری کے منصوبوں میں تیزی آنے کی توقع کی جا سکتی ہے۔ ترجمان کے مطابق سیکریٹری جنرل نے اسرائیلی بستیوں کی تعمیر میں پیشرفت کے منصوبوں کو تناؤ اور تشدد اور دیرپا امن کی راہ میں بڑی رکاوٹ قراردیا۔ انہوں نے اس بات کا اعادہ کیا کہ بستیاں بین الاقوامی قانون کی کھلی خلاف ورزی ہیں اورایک قابل عمل دو ریاستی حل میں ایک بڑی رکاوٹ ہیں۔ اسرائیل آبادکاری میں توسیع کے تمام منصوبوں کو فوری واپس لے۔ واضح رہے کہ صیہونی حکومت نے گذشتہ روز مغربی کنارے میں ساڑھے چار ہزار عمارتوں کی تعمیر کا منصوبہ متعارف کرایا تھا۔
