اسرائیل کھلے عام فلسطینیوں کی نسل کشی کر رہا ہے، ایمنسٹی

غزہ : انسانی حقوق کی عالمی تنظیم ایمنسٹی انٹرنیشنل نے کہا ہے کہ اسرائیل دنیا کی نظروں کے سامنے کھلے عام نسل کشی کا ارتکاب کر رہا ہے۔
ایمنسٹی انٹرنیشنل نے اپنی سالانہ رپورٹ میں کہا ہےکہ اسرائیل فلسطینیوں کی نسلی صفائی کے مخصوص ارادے کے ساتھ غیر قانونی اقدامات کر رہا ہے۔ اسرائیل نے شہریوں کو شدید جسمانی یا ذہنی نقصان پہنچا کر اور جان بوجھ کر زندگی کے حالات کا تباہ کن بنا کر اقوام متحدہ کے نسل کشی کنونشن کی خلاف ورزی کی ہے۔ایمنسٹی نے کہا کہ بین الاقوامی برادری اور بین الاقوامی عدالت انصاف کے انتباہات کے باوجود اسرائیل نے غزہ تک انسانی ہمدردی کی بنیاد پر امداد کی رسائی سے بار بار انکار کیا اور رکاوٹیں ڈالیں۔
سربراہ ایمنسٹی اگنیس کالمارڈ نے کہا کہ اسرائیل نے ہزاروں فلسطینیوں کو مار ڈالا۔ کئی خاندانوں کو صفحہ ہستی سے مٹا دیا۔ گھروں، معاش، اسپتالوں اور اسکولوں کو تباہ کر دیا اور ریاستیں بے بسی سے دیکھتی رہیں۔