اسرائیل امریکی فنڈنگ سے غزہ میں نسل کشی کر رہا ہے؛ زہران کا ٹرمپ کے سامنے کڑوا سچ

واشنگٹن : امریکی صدر ڈونلڈ ٹرمپ سے ملاقات میں نیویارک کے میئر زہران ممدانی نے غزہ میں نسل کشی کے لیے امریکی فنڈنگ کی مذمت کردی۔ ممدانی نے امریکی ٹیکس دہندگان کے پیسے کو انسانی حقوق کی خلاف ورزیوں پر خرچ کیے جانے پر شدید تشویش ظاہر کی۔ ممدانی کا کہنا تھا کہ نیویارک کے شہری جنگوں کا خاتمہ اور ٹیکس کے پیسے کا غلط استعمال روکنا چاہتے ہیں۔
صحافیوں کے سوال پر ممدانی نے واضح طور پر کہا کہ اسرائیل غزہ میں نسل کشی کر رہا ہے اور امریکی حکومت اس کی مالی معاون ہے۔ ممدانی نے بتایا کہ انہوں نے صدر ٹرمپ کے ساتھ اس بارے میں عوامی تحفظات شیئر کیے کہ شہری اپنے ٹیکس کا پیسہ بنیادی انسانی وقار اور مقامی ضروریات پر خرچ ہوتے دیکھنا چاہتے ہیں۔ انہوں نے اس بات پر بھی زور دیا کہ انسانی حقوق کے احترام کے ساتھ ساتھ نیویارک والوں سے کیے گئے وعدوں پر عمل کرنا ناگزیر ہے۔ ممدانی نے امن کی ہر کوشش کو سراہتے ہوئے کہا کہ لوگ بے مقصد جنگوں کی فنڈنگ سے تنگ آ چکے ہیں۔