اسرائیل قابض قوت ہے، اُسےحق دفاع حاصل نہیں، اقوام متحدہ

جنیوا: اقوام متحدہ کی نمائندہ برائے مقبوضہ فلسطینی علاقہ جات فرانسيسكا البانيز نے کہا ہے کہ اسرائیل کو غزہ میں حق دفاع حاصل نہیں ہے کیونکہ وہ وہاں قابض قوت ہے۔ عرب نیوز سے بات کرتے ہوئے فرانسيسكا البانيز نے کہاکہ حماس کے کثیر جہتی حملے پر اسرائیل کا فوجی ردعمل محض اپنی سرزمین اور اپنے شہریوں کے دفاع سے آگے بڑھ گیا ہے۔ بین الاقوامی عدالت انصاف کا اصولی قانون کہتا ہے کہ فوجی قبضے کے تناظر میں اپنے دفاع کا اطلاق نہیں ہو سکتا۔ انہوں نے کہاکہ سیاست دانوں اور رہنماؤں نے اپنے بیانات میں اعلان کیا ہےکہ غزہ میں مقیم تمام فلسطینی حماس کے اقدامات کے ذمہ دار ہیں۔ تو ان کی کمر توڑ دینی چاہیے۔ یہ زبان انتہائی خطرناک اور نسل کشی کی زبان ہے۔انہوں نے کہاکہ اسرائیل کی فوجی مہم نہایت تباہ کن اور بلاامتیاز رہی ہے اور اس نے غزہ کا 42 فیصد رہائشی علاقہ تباہ کر دیا ہے۔ اسرائیل نے شہری علاقوں جن میں اسپتال، عبادت گاہیں اور مارکیٹیں شامل ہیں، کو بھی نشانہ بنایا ہے۔