Raza Musani 
تہران: ایرانی وزیرخارجہ حسین امیر عبداللہیان نے کہا ہے کہ اسرائیلی حکومت غزہ کی جنگ میں حماس کی نابودی سمیت اپنے بیان کردہ کسی بھی اہداف تک نہیں پہنچ سکی ہے۔ وزیرخارجہ امیر عبداللہیان نے صدر رئیسی اور دیگر کابینہ کے اراکین کو غزہ کے بارے میں بریفنگ میں بتایا کہ صیہونی حکومت گذشتہ تین مہینوں سے غزہ میں مظلوم فلسطینیوں کے خلاف حملوں میں شدت لارہی ہے تاہم 90 دنوں سے زیادہ کے دوران صیہونی حکومت کو کوئی بھی ہدف حاصل نہیں ہوا۔ حماس کی نابودی، اسے غیر مسلح کرنا اور یرغمالیوں کو آزاد کرانا وہ اہداف جن میں اسرائیل مکمل ناکام ہے۔ انہوں نے کہا کہ اسی وجہ سے صیہونیوں نے بیروت میں صالح العروری کو قتل کرکے ایک نام نہاد جعلی فتح اپنے نام کرنے کی کوشش کی ہے۔ انہوں نے ایران کے دیرینہ موقف کو دہرایا کہ خطے میں پائیدار امن کے لئے غزہ میں صیہونی جارحیت کو روکنا ہوگا۔ فلسطین کا محاصرہ ختم کرکے غزہ میں امدادی سامان کی فراہمی ضروری ہے۔ فسلطینیوں کو اپنے مستقبل کا خود فیصلہ کرنے کا حق ہے۔
