Raza Musani 
دوحہ : اسرائیل اور حماس کے درمیان جنگ بندی اور قیدیوں کے تبادلے کے معاہدے کے دوسرے مرحلے کے لیے مذاکرات شروع ہو گئے ہیں۔ حماس کے رہنما سمیع ابوزہری نے بتایا کہ ثالث ممالک نے دونوں فریقین کے اقدامات کا جائزہ لینا شروع کردیا ہے تاکہ غزہ جنگ بندی کا دوسرا مرحلہ شروع کیا جاسکے۔ انہوں نے کہاکہ غزہ کا مستقبل صرف فلسطینیوں سے جڑا ہوا ہے اور نیتن یاہو کے پاس صرف ایک ہی راستہ ہے کہ وہ معاہدے کی تکمیل تک اس پر کاربند رہے۔ ابو زہری نے نیتن یاہو کے لڑائی میں واپس آنے کی باتوں کو کھوکھلا قرار دیا اور کہا کہ وہ یہ دعوے اپنے لوگوں کو مطمیئن کرنے کیلئے کررہے ہیں۔
حماس رہنما کا کہنا تھا کہ غزہ کی پٹی میں انتظامی حوالے سے کوئی خلا پیدا نہیں ہوا ہے اور فلسطینی عوام کی حمایت یافتہ حکومت کی تشکیل کا خیرمقدم کیا جائے گا۔
