اسرائیل اور اس کے اتحادی غزہ میں حقیقت کو تبدیل نہیں کر سکیں گے، اسماعیل ہنیہ

دوحہ: حماس کے سربراہ اسماعیل ہنیہ نے کہا ہے کہ حماس کی مقرر کردہ قیمت ادا کئے بغیر اسرائیل کو قیدی واپس نہیں ملیں گے۔ اسماعیل ہنیہ نے ایک انٹرویو میں کہاکہ حماس ایک تحریک ہے جس کی جڑیں اس کی سرزمین پر ہیں۔ اسرائیل اور اس کے اتحادی غزہ میں حقیقت کو تبدیل نہیں کر سکیں گے۔ انہوں نے کہاکہ صرف فلسطینی عوام کو ہی فلسطین کے مستقبل کا تعین کرنے کا مکمل حق حاصل ہے۔ اگر دشمن چاہتا ہے کہ یہ ایک طویل جنگ ہو تو ہم اپنے دشمن سے زیادہ طویل جنگ کے لیے تیار ہیں۔ انہوں نےعرب اسلامی سربراہ اجلاس کے فیصلوں پر عمل درآمد کا مطالبہ کیا۔ ادھر حماس کے رہنما اسامہ حمدان نے
اسپتالوں کی حقیقت کا جائزہ لینے اور اسرائیل کے جھوٹے دعووں کو جانچنے کے لیے بین الاقوامی تحقیقاتی کمیٹی تشکیل دینے کا مطالبہ کردیا۔ انہوں نے الشفا اسپتال پر جارحیت کے جرم میں امریکہ کو براہ راست ذمہ دار ٹھہرایا۔ اسامہ حمدان نے کہا کہ اسرائیل کا اسپتالوں، بیکریوں کو نشانہ بنانے اور پانی کی ترسیل روکنے کا مقصد لوگوں کو بے گھر کرنے کے منصوبے کو عملی جامہ پہنانا ہے۔