ایران کا ایٹمی پروگرام ایک سے دو سال پیچھے چلا گیا، پینٹاگون کا مکمل تباہی کے دعوے سے گریز

واشنگٹن : امریکی محکمہ دفاع پینٹاگون نے جنونی صدر ٹرمپ کے برعکس ایرانی ایٹمی پروگرام کی مکمل تباہی کے دعوے سے گریز کرتے ہوئے کہا ہے کہ امریکی حملوں سے ایران کا ایٹمی پروگرام ایک سے دو سال پیچھے چلا گیا ہے۔ محکمہ دفاع کے ترجمان شان پارنیل نے کہا کہ واشنگٹن کی طرف سے نشانہ بننے والی تین ایرانی جوہری تنصیبات کو تباہ کر دیا گیا۔ انہوں نے ان حملوں کو ایک جرات مندانہ آپریشن کے طور پر سراہا۔ پارنیل نے نامہ نگاروں کو بتایا کہ ہم نے ان کے پروگرام کو کم از کم ایک سے دو سال تک کم کر دیا ہے۔
اس کے برعکس صدر ٹرمپ نے کہا تھا کہ ایران کا جوہری پروگرام ایسا ختم کر دیا گیا ہے جیسا کہ پہلے کبھی تھا ہی نہیں۔
اس سے قبل محکمہ خارجہ نے مطالبہ کیا تھا کہ ایران آئی اے ای اے کو جوہری پروگرام تک رسائی کی اجازت دے۔ ترجمان ٹیمی بروس نے ایک بیان میں کہا کہ یہ ناقابل قبول ہے کہ ایران نے آئی اے ای اے کے ساتھ تعاون کو ایسے وقت میں معطل کرنے کا انتخاب کیا جب اس کے پاس راستہ تبدیل کرنے اور امن اور خوشحالی کا راستہ منتخب کرنے کا موقع موجود ہے۔