ایران کا اسرائیل پر وسیع پیمانے پر ڈرونز اور کروز میزائل سے حملہ

تہران: ایران نے اسرائیل پر 300 سے زائد ڈرونز اور کروز میزائل سے حملہ کردیا۔ ایرانی پاسداران انقلاب نے کہا ہے کہ اس نے اسرائیل کے مخصوص فوجی اہداف کو نشانہ بنایا۔ ڈرون بیس کلو گرام بارودی مواد سے لیس ہیں۔ ایرانی ڈرونز نے کرمانشاہ، دوکوہہ، مغربی ایران اور دیگر علاقوں سے اڑان بھری ہے۔ اسرائیل نے امریکا اور اردن کی مدد سے متعدد ایرانی میزائل مار گرائے۔ ایرانی میزائل اسرائیل میں مختلف مقامات پر گرے۔ حملہ شروع ہوتے ہی اسرائیلی عوام میں کھلبلی مچ گئی اور لوگ میزائل حملوں سے بچنے کیلئے پناہ گاہوں کی طرف بھاگ کھڑے ہوئے۔ اسرائیل پر ایران کے حملے کے بعد اردن، شام، لبنان اور عراق نے اپنی فضائی حدود بند کردیں۔ ایرانی حملے کے بعد اردن نے ہنگامی حالت بھی نافذ کردی ہے ۔ ایران کے وزیر دفاع نے ایک بیان جاری کرکے پڑوسی ممالک کو خبردار کیا ہے کہ ان میں سے جو بھی ڈرون کو روکنے کے لیے اسرائیل کے لیے اپنی فضائی حدود کھولے گا اسے نشانہ بنایا جائے گا۔ اسرائیلی وزیراعظم نیتن یاہو نے اپنے ردعمل میں کہا ہے کہ اسرائیل ہر صورتحال کے لیے تیار ہے۔