ایران نے مظلوم فلسطینیوں سمیت ملت اسلامیہ کا سر فخر سے بلند کردیا، متحدہ علماء محاذ پاکستان

متحدہ علماء محاذ پاکستان میں شامل مختلف مکاتب فکر کے جید علماء مشائخ نے کہا ہے کہ اسرائیل پر ایران کے خیبر میزائل حملوں نے جرأت حیدری کے جذبات کو بیدار کرکے مظلوم فلسطینیوں سمیت ملت اسلامیہ کے سر فخر سے بلند کردیئے ہیں اور اسرائیل و امریکہ کا غرور خاک میں ملا دیا ہے، پاکستان سمیت مسلم حکمران اگر پوری قوت کیساتھ غزہ فلسطین پر اسرائیلی جارحیت کیخلاف مشترکہ کردار ادا کریں تو چند گھنٹوں میں غاصب قابض قاتل اسرائیل ارض مقدس فلسطین چھوڑ کر بھاگ جائے گا۔
ان کا کہنا تھا کہ ایران کا ظلم کے خلاف اپنے دفاع میں اسرائیل پر جوابی حملہ عقلاً ، شرعاً اور قانوناً جائز تھا۔ میڈیا کو جاری کردہ مشترکہ بیان دینے والوں میں محاذ کے بانی سیکریٹری جنرل مولانا محمد امین انصاری، حجة الاسلام علامہ مرزا یوسف حسین، چیئرمین علامہ عبدالخالق فریدی سلفی، شیخ الحدیث مفتی محمد داؤد، علامہ ڈاکٹر مفتی عبدالغفور اشرفی، شیخ الحدیث مولانا سلیم اللہ خان ترک، علامہ محمد حسن شریفی، علامہ مفتی ضیاء اللہ سیالوی، علامہ مفتی روشن دین الرشیدی، مفتی اسدالحق چترالی و دیگر شامل ہیں۔