Raza Musani 
کراچی : ایرانی صدر ابراہیم رئیسی تین روزہ دورہ پاکستان مکمل کرکے واپس روانہ ہوگئے۔ کراچی ایئرپورٹ پر گورنر اور وزیراعلیٰ سندھ نے معزز مہمانوں کو الوداع کہا۔ ایرانی صدر کا تین روزہ دورہ مصروف ترین رہا۔ دورے کے آخری مرحلے میں ایرانی صدر کراچی پہنچے۔ گورنر ہاؤس میں گورنر کامران ٹیسوری اور وزیر اعلیٰ مراد علی شاہ سے ملاقات کی اور مختلف امور پر تبادلہ خیال کیا۔ ملاقات کے بعد ایرانی صدرنے قائدِ اعظم محمد علی جناح کے مزار پر حاضری دی۔ پھول چڑھائے اور فاتحہ خوانی کی۔ مزار قائد کے بعد ایرانی صدر وزیراعلیٰ ہاؤس پہنچے جہاں ان کے اعزاز میں عشائیہ کا اہتمام کیا گیا۔ دوران تقریب ابراہیم رئیسی کو ڈاکٹریٹ کی اعزازی ڈگری بھی دی گئی۔
کراچی سے پہلے ایرانی صدر نے لاہورکا دورہ کیا۔ جہاں انہوں نے مزار اقبال پر حاضری دی۔ وزیراعلیٰ مریم نواز نے ایرانی صدر سے ملاقات کی جبکہ گورنر پنجاب بلیغ الرحمٰن نے مہمانوں کے اعزاز میں ظہرانہ دیا۔
ایرانی صدرنے گورنمنٹ کالج یونیورسٹی میں طلبہ و طالبات سے خطاب کیا۔ ایرانی صدر نے دورہ پاکستان میں صدر آصف زرداری۔ وزیراعظم شہبازشریف۔ آرمی چیف جنرل عاصم منیر اور چیئرمین سینیٹ اور اسپیکر قومی اسمبلی سے بھی ملاقاتیں کیں۔
