Raza Musani 
ایران کے وزیر خارجہ حسین امیر عبداللہیان نے اسلامی تعاون تنظیم کے سیکریٹری جنرل حسین ابراہیم طہ کے ساتھ ٹیلی فونی گفتگو میں غزہ کے خلاف صیہونی فوج کے جرائم بالخصوص رفح پر غاصب اسرائیل کے تازہ ترین حملوں اور غزہ میں انسان دوستانہ امداد کی ابتر صورتحال اور اسی طرح اس سلسلے میں اسلامی تعاون تنظیم کے اقدامات کے بارے میں تبادلۂ خیال کیا۔
ایرانی وزیرخارجہ امیرعبداللہیان نے اسلامی تعاون تنظیم کی وزراء کونسل کے اجلاس کو ساڑھے چار مہینے کا عرصہ گذر جانے کا ذکر کرتے ہوئے غزہ اور بالخصوص رفح کی ابتر صورتحال کا جائزہ لینے اور غاصب صیہونی حکومت کے جارحانہ اقدامات کے خلاف ٹھوس قدم اٹھائے جانے کے مقصد سے او آئی سی کی وزراء کونسل کا ہنگامی اجلاس بلانے کا مطالبہ کیا۔
او آئی سی کے سیکریٹری جنرل حسین ابراہیم طہ نے بھی غزہ کے خلاف صیہونی حکومت کے حملے جاری رہنے کی مذمت کی اور ان حملوں پر اظہار تشویش کرتے ہوئے اس سلسلے میں اسلامی تعاون تنظيم کی سرگرمیوں اور اقدامات کے بارے میں ایک رپورٹ پیش کی اور ساتھ ہی انہوں نے وزراء کی کونسل کا ہنگامی اجلاس منعقد کرنے کی تجویز کا خیرمقدم کیا۔
