Raza Musani 
تہران : ایران کے وزیرِ خارجہ عباس عراقچی نے کہا ہے کہ امریکا اور صیہونی حکومت کے ساتھ جاری جنگ میں ایران کسی عارضی جنگ بندی کو قبول نہیں کرے گا۔ امریکی ٹی وی پروگرام میں انٹرویو دیتے ہوئے ایران کے وزیرِ خارجہ عباس عراقچی نے کہا کہ ایران جنگ بندی کی کسی نئی اپیل کو مسترد کر دے گا کیونکہ امریکا اور صیہونی حکومت گزشتہ برس جون میں بارہ روزہ جنگ کے خاتمے کیلئے ہونے والی جنگ بندی پہلے ہی توڑ چکے ہیں۔ انہوں نے کہا کہ اب دوبارہ جنگ بندی کی بات کرنا قابلِ قبول نہیں اور اس تنازع کا مستقل خاتمہ ضروری ہے۔ عباس عراقچی کے مطابق جب تک جنگ اور جارحیت مکمل طور پر ختم نہیں ہوتی ایران اپنے عوام اور قومی سلامتی کے دفاع کیلئے لڑائی جاری رکھے گا۔ عباس عراقچی نے اس مطالبے کو مسترد کرتے ہوئے کہا کہ ایران کبھی ہتھیار نہیں ڈالے گا اور ضرورت پڑنے تک لڑائی جاری رکھے گا۔ روسی خفیہ معلومات کی ممکنہ مدد سے متعلق سوال پر انہوں نے براہِ راست تصدیق نہیں کی تاہم کہا کہ ایران اور روس کے درمیان تعاون کوئی نئی یا خفیہ بات نہیں ہے۔
