Raza Musani 
تہران : ایرانی وزیر خارجہ عراقچی نے کہا ہے کہ ایران کسی بھی صورت میں جوہری ہتھیار بنانے یا حاصل کرنے کی کوشش نہیں کرے گا۔ عباس عراقچی نے امریکی صدر ڈونلڈ ٹرمپ کی جانب سے تہران پر اپنی نام نہاد زیادہ سے زیادہ دباؤ کی پالیسی کو دوبارہ مسلط کرنے والے ایگزیکیٹو آرڈر کو مسترد کرتے ہوئے اسے ایک ناکام تجربہ قرار دیا ہے۔ سید عباس عراقچی نے اپنے بیان میں کہا کہ مزید دباؤ بڑھانے کی پالیسی ایک ناکام ہوچکی ہے۔ اس کا اعادہ کرنے کی صورت میں صرف مزاحمت میں اضافہ ہوگا۔ سمجھدار لوگ اس کے بجائے زیادہ سے زیادہ عقلمندی کا انتخاب کرتے ہیں۔ انہوں نے کہا کہ ہم نے پہلے بھی واضح طور پر اعلان کیا ہے کہ کسی بھی حالت میں جوہری ہتھیار بنانے، حاصل کرنے یا اس کی کوشش کرنے کا ارادہ نہیں رکھتے ہیں۔ عراقچی نے کہاکہ اس بات کی عملی ضمانت حاصل کرنا کہ ایران جوہری ہتھیاروں کی طرف نہیں بڑھے گا، مشکل نہیں ہے بشرطیکہ اس کے بدلے میں اقتصادی دباؤ اور پابندیوں کو ختم اور ایران کے خلاف معاندانہ اقدامات کا سلسلہ ترک کیا جائے۔
