ایران میں آزمائشی مدت کے لئے حجاب اور عفت بل منظور

تہران: ایرانی پارلیمنٹ نے 3 سال کی آزمائشی مدت کے لئے حجاب اور عفت بل کی منظوری دے دی۔ بل کے تحت حجاب اور ڈریس کوڈ کی خلاف ورزی کرنیوالی خواتین اور لڑکیوں کیلئے جرمانے اور سزاؤں میں اضافہ کیا گیا ہے۔ پارلیمنٹ کے 152 ارکان نے بل کے حق میں اور 34 نے مخالفت میں ووٹ دیا۔ جبکہ سات ارکان غیرحاضر رہے۔ قانون کے تحت بلوغت کی عمر سے زیادہ خواتین اور لڑکیوں کو بال ڈھانپنا اور جسم کے خدوخال کو چھپانے کیلئے ڈھیلا لباس پہننا ہوگا۔ خلاف ورزی پر انہیں 10 دن سے دو ماہ کی قید یا پانچ ہزار سے پانچ لاکھ ریال تک جرمانہ ہوگا۔ میڈیا اور سوشل نیٹ ورکس پر عریانیت کو فروغ دینے یا حجاب کا مذاق اڑانے کے لیے جرمانہ تجویز کیا گیا ہے۔ قانون میں یہ بھی کہا گیا ہے کہ سیاحت سے متعلقہ مقامات پر حجاب نہ پہننے والوں کو ملازمت سے ہاتھ دھونا پڑیں گے۔