ایران فلسطین کی حمایت میں سب سے آگے ہے، اسماعیل ہنیہ

تہران: حماس کے سربراہ اسماعیل ہنیہ نے کہا ہے کہ فلسطینیوں نے غزہ کی جنگ کے دوران افسانوی مزاحمت کا مظاہرہ کیا ہے۔ جس کے نتیجے میں اسرائیل اپنے فوجی مقاصد حاصل کرنے میں ناکام رہا۔ جنگ بندی قرارداد کے ایک دن بعد حماس کے سربراہ اسماعیل ہنیہ ایرانی حکام سے مذاکرات کیلئے تہران پہنچے اور ایرانی وزیرخارجہ حسین امیر عبداللہیان سے ملاقات کی اور غزہ کی مجموعی صورتحال پر تبادلہ خیال کیا۔ فریقین نےغزہ کی پٹی کے علاوہ مغربی کنارے میں صیہونی حکومت کی جاری جارحیت کا بھی جائزہ لیا۔ بعد میں مشترکہ نیوز کانفرس کے دوران اسماعیل ہنیہ نے کہا کہ اسرائیل کی سیاسی حمایت اب کم ہوتی جا رہی ہے، جس کا ثبوت اقوام متحدہ کی سلامتی کونسل کی قرارداد ہے جس میں جنگ بندی کا مطالبہ کیا گیا ہے۔انہوں نے ایران کی تعریف کرتے ہوئے کہا کہ وہ فلسطین کے مقصد اور قوم کی حمایت میں سب سے آگے کھڑے ہیں۔