ایران میں مصنوعی ذہانت کے حامل ہزار کلو میٹر سے زائد رینج کے کروز میزائل تیار

تہران: سپاہ پاسداران انقلاب اسلامی کی بحریہ کے سربراہ رئیر ایڈمرل علی رضا تنگسیری نے اعلان کیا ہے کہ ایران نے مصنوعی ذہانت کے حامل 1000 کلومیٹر سے زائد رینج کے حامل کروز میزائل تیار کیے ہیں۔ آپریشن والفجر 8 کی یاد میں منعقدہ تقریب سے خطاب میں علی رضا تنگسیری نے کہا کہ ایرانی مسلح افواج دشمن کا مقابلہ کرنے کے لئے پوری طرح تیار ہیں۔ سپاہ پاسداران انقلاب کی بحریہ ایرانی مسلح افواج کے ساتھ مل کر ملک کی سمندری حدود کی مکمل حفاظت کرے گی اور کسی بھی قسم کی دراندازی کو ناکام بنا دے گی۔ انہوں نے ایران کے جدید دفاعی ساز و سامان، بشمول میزائل، ڈرون، جنگی کشتیوں اور آبدوزوں کا ذکر کرتے ہوئے دشمنوں کو خبردار کیا کہ وہ اپنی حرکات و سکنات کے بارے میں محتاط رہیں۔
ایڈمرل تنگسیری نے مزید کہا کہ خلیج فارس بین الاقوامی سمندر نہیں ہے اور چونکہ اس کی گہرائی 200 میٹر سے کم ہے لہذا اسے عالمی سمندر قرار نہیں دیا جا سکتا اس لیے غیر ملکی طاقتوں کو اس میں مداخلت کا کوئی حق حاصل نہیں۔