ایران کی شام کی نئی حکومت سے بالواسطہ رابطوں کی تصدیق

تہران: ایران نے شام کی نئی حکومت سے بالواسطہ رابطوں کی تصدیق کردی۔ خصوصی ایلچی برائے شامی امور محمد رضا رؤف شیبانی نے کہاہے کہ ایران بالواسطہ طور پر دمشق کے ساتھ رابطے میں ہے۔ ایران کو شام سے پیغامات موصول ہوئے ہیں۔ تاہم انہوں نے ثالثی کرنے والے ملک سے متعلق کسی قسم کی وضاحت نہیں کی۔ انہوں نے مزید کہاکہ ایران شام کی صورتحال کو دیکھ رہا ہے۔ دوطرفہ تعلقات دونوں ممالک کی خودمختاری اور معاملات میں عدم مداخلت کی بنیاد پر ہونے چاہییں۔ شیبانی نے اس بات پر زور دیا کہ ایران شام میں ہونے والے واقعات کو دیکھ رہاہے اور مناسب وقت پر اپنے لائحہ عمل کا تعین کرے گا۔ انہوں نے کہا کہ تہران اس بات پر قائم ہے کہ شام کی خود مختاری اور مستقبل کو اس کے اپنے لوگوں کو تشکیل دینا چاہیے۔ ہم اس ملک کے معاملات میں کسی بھی بیرونی مداخلت کے خلاف ہیں۔