Raza Musani 
تہران : ایران اور وینیزویلا نے مختلف شعبوں میں تعاون کو فروغ دینے کے لیے 20 سالہ شراکت داری کے معاہدے پر دستخط کردیے۔ ایرانی صدر ابراہیم رئیسی اور وینزویلا کے ہم منصب نکولس مادورو کی موجودگی میں معاہدے پر دستخط کئے گئے۔ شراکت داری کے معاہدے میں سائنس، ٹیکنالوجی، زراعت، تیل اور گیس، پیٹرو کیمیکل، سیاحت کے ساتھ ساتھ ثقافت کے شعبوں میں تعاون شامل ہے۔ ابراہیم رئیسی نے اس معاہدے کو امریکا اور مغربی دباؤ کے باوجود دوطرفہ تعلقات کو بڑھانے کے لیے دوطرفہ عزم کی علامت قرار دیا۔ تقریب کے بعد پریس کانفرنس سے خطاب میں ایرانی صدر نے کہا کہ اسلامی جمہوریہ ایران ہمیشہ خارجہ پالیسی کے میدان میں آزاد ممالک کے ساتھ تعلقات کا خواہاں رہا ہے اور وینزویلا نے دشمنوں اور سامراج کی پابندیوں کے خلاف مزاحمت کی ہے اور مثالی مزاحمت کا مظاہرہ کیا ہے۔ انہوں نے مزید کہا کہ گزشتہ 24 سالوں میں ہمارے ملک کے خلاف متعدد پابندیاں عائد کی گئی اور دھمکیاں دی گئی جبکہ ایرانی قوم نے ملک کی ترقی کی خاطر پابندیوں کو ایک موقع میں تبدیل کرنے کا فیصلہ کیا ہے۔
