قیدیوں کے تبادلے کا چوتھا مرحلہ، 183 فلسطینی قیدی رہا

غزہ : قیدیوں کے تبادلے کے چوتھے مرحلے میں ایک سو تراسی فلسطینی رہا کردئے گئے۔ اسرائیلی جیلوں سے رہائی کے بعد فلسطینی مغربی کنارے اور غزہ پہنچے تو ان کا بھرپور استقبال کیا گیا۔ ان میں 18 کو عمر قید کی سزا اور 54 کو لمبی سزائیں سنائی گئی تھیں۔ مقبوضہ مغربی کنارے سے رہائی پانے والے 25 قیدی رام اللہ شہر پہنچ گئے۔ اس سے پہلے حماس نے تین اسرائیلی قیدیوں کو ہلال احمر کے عملے کے حوالے کیا۔ حماس نے دو اسیروں کو جنوبی غزہ میں رہا کیا جبکہ تیسرے کو شمالی غزہ میں ہلال احمر کے حوالے کیا گیا۔ حماس کے مسلح ونگ القسام بریگیڈز کے سینکڑوں نقاب پوش جنگجوؤں نے سیکورٹی کی ذمہ داری سنبھال رکھی تھی۔ دستخطی تقریب کیلئے ایک اسٹیج بنایا گیا تھا۔ اسیروں کی حوالگی کے بعد ریڈ کراس کی گاڑیاں انہیں لیکر چلی گئیں۔