پانچواں دور، 10 اسرائیلی اور خواتین و بچوں سمیت 30 فلسطینی رہا

غزہ: قیدی تبادلے کے پانچویں دور میں حماس نے 10 اسرائیلی اور دو تھائی یرغمالیوں کو رہا کردیا۔ غزہ میں عارضی جنگ بندی کے پانچویں دن حماس نے منگل کی رات 10 اسرائیلی قیدیوں کو ریڈ کراس کے حوالے کیا۔ جنہیں حسب سابق رفح کے راستے مصر سے اسرائیل پہنچادیا گیا۔ رہائی پانیوالی تمام خواتین ہیں۔ بدلے میں اسرائیل نے 15 خواتین اور 15 بچوں سمیت تیس فلسطینی آزاد کئے۔
جنگ بندی کے پانچ دنوں میں 60 اسرائیلیوں اور 180 فلسطینیوں کو رہائی ملی ہے۔ معاہدے کے تحت چھٹے دور کیلئے اسرائیل نے قیدیوں کی فہرست حماس تک پہنچادی ہے۔ آج بھی دس اسرائیلی اور تیس فلسطینیوں کی رہائی متوقع ہے۔ فلسطینی مزاحمتی گروپوں نے قیدیوں کے معاہدے اور عارضی جنگ بندی میں مصری اور قطری کردار کو سراہا ہے اور انہوں نے اسرائیلی کی جانب سے جنگی خلاف ورزیوں کو روکنے کے لیے اپنی ذمہ داریاں پوری کرنے پر زور دیا ہے۔