Raza Musani 
اسلام آباد: ایران کے صدر ابراہیم رئیسی نے کہا ہے کہ غزہ کے نہتے فلسطینی اسلامی اُمہ کی طرف دیکھتے دیکھتے مایوس ہو گئے ہیں۔ اسلام آباد میں دانشوروں سے خطاب میں ایرانی صدر نے کہا کہ امریکہ۔ برطانیہ اور دوسرے متعدد یورپی ملک فلسطینیوں کی نسل کشی کیلئے اسرائیل کو اربوں ڈالرز کے ہتھیار اور دیگر سازو سامان مہیا کر رہے ہیں۔ یہود و نصاریٰ کی اتحادی قوت کا مقابلہ اکیلا ملک نہیں کر سکتا۔ اس کیلئے اتحاد بین المسلمین کے فلسفے کو اپنانا ہو گا۔ انہوں نےکہا کہ کتنے افسوس کی بات ہے کہ غزہ میں بے گناہ خواتین اور معصوم بچوں سمیت چونتیس ہزار فلسطینی شہید کئے گئے لیکن انسانی حقوق کے دعویدار امریکا۔ برطانیہ اور فرانس اس کے باوجود صیہونی حکومت کی حمایت پر مصر ہیں۔ ان ممالک کی وجہ سے اقوام متحدہ بھی اپنی افادیت کھو چکا ہے۔ آج عالم بشریت ایسے نظام کی تلاش میں ہے جس میں مظلوم کو ظالم سے اپنا حق ملے۔
