غزہ میں اسرائیلی درندگی کی انتہا، الشفا اسپتال کے دروازے پر ایمبولینسز پر بمباری

غزہ : صیہونی فوج کی درندگی انتہا کو پہنچ گئی۔ ایمبولینسوں کے قافلے اور اسکول کو میزائلوں کا نشانہ بنادیا۔ صیہونی فوج نے الشفا اسپتال کے دروازے پر ایمبولینسوں کے قافلے پر ڈرون سے میزائل داغے۔ حملے میں کئی ایمبولینس تباہ ہوگئیں اور چودہ افراد شہید اور کئی زخمی ہوگئے۔ ان ایمبولینسوں میں شدید زخمی مریضوں کو رفح کراسنگ لے جایا جارہا تھا۔
صیہونی جنگی طیاروں نے ایک اسکول کو بھی نشانہ بنایا جس سے 20 فلسطینی شہید اور کئی زخمی ہوئے۔
جنگی طیاروں نے جبالیہ۔ خان یونس۔ زیتون اور دیگر علاقوں میں اقوام متحدہ کے چار اسکولوں اور کئی رہائشی عمارتوں پر بھی میزائل داغے۔ بیت لاہیا میں قبرستان پر بھی بم برسادئے ۔ جبالیا کیمپ پر تیسرے حملہ کے بعد شہدا کی تعداد 2 سو سے تجاوز کر گئی ہے جبکہ 7 سو سے زیادہ زخمی اور 100 سے زائد افراد لاپتا ہوگئے ہیں۔ اسرائیلی فوج نے غزہ سٹی کو مکمل گھیرے میں لینے کا دعویٰ کیا ہے۔
حماس اور صیہونی فوج کے درمیان گھمسان کی لڑائی جاری ہے۔ حماس نے اسرائیلی فوج پر بڑا حملہ کیا ہے، حملے میں 6 ٹینکوں سمیت 9 فوجی گاڑیاں تباہ ہوگئیں۔ حملے میں پانچ صیہونی فوجی ہلاک ہوگئے۔ دو دن میں ہلاک فوجیوں کی تعداد 24 ہوگئی ہے۔