عمران خان اور اہلیہ دوران عدت نکاح کیس میں بری

اسلام آباد: سابق وزیراعظم عمران خان اور اہلیہ کو دوران عدت نکاح کیس میں بری کردیا گیا۔ اسلام آباد کی سیشن کورٹ نے عمران خان اور اہلیہ بشریٰ بی بی کی سزاؤں کیخلاف اپیلیں منظور کرلیں اور ٹرائل کورٹ کا فیصلہ کالعدم قرار دے دیا۔ عدالت نے دونوں کی رہائی کے احکامات دیتے ہوئے رہائی کی روبکار جاری کردئے۔ عدالت نے کہا کہ دونوں کسی اور کیس میں گرفتار نہیں ہیں تو انہیں رہا کردیا جائے۔ عدالت نے بشریٰ بی بی کے سابق شوہر خاور مانیکا کی میڈیکل بورڈ بنانے اور علماء کی رائے سے متعلق دونوں درخواستیں مسترد کردیں۔ واضح رہے کہ عمران خان کی اہلیہ بشری بی بی سے شادی کے چھ سال بعد ان کے شوہر خاور مانیکا نے پانچ نومبر دوہزار تئیس کو مقامی عدالت میں شکایت درج کرائی کہ دونوں نے دوران عدت نکاح کیا ہے۔ سینئر سول جج قدرت اللہ نے رواں سال تین فروری کو عمران خان اوران کی اہلیہ کو سات سات سال قید کی سزا سنادی تھی۔