Raza Musani 
جدہ : اسلامی تعاون تنظیم او آئی سی نے خبردار کیاہے کہ فلسطینی پناہ گزین بچوں کو تعلیم کے بنیادی حق سے محروم اور ان پر اسرائیلی نصاب مسلط کرنے کے سنگین نتائج نکلیں گے۔ او آئی سی نے مقبوضہ بیت المقدس میں انروا کے چھ اسکولوں کو بند کرنے کے فیصلے کی شدید مذمت کی اور اس فیصلے کو اقوام متحدہ کی ایجنسی کی موجودگی اور کردار کو نشانہ بنانے کے غیر قانونی اسرائیلی اقدامات کا حصہ قرار دیا ہے۔ بیان میں کہا گیاہے کہ اسرائیلی اقدام اقوام متحدہ کے چارٹر اور متعلقہ قراردادوں کی کھلی خلاف ورزی ہے۔ فیصلے کا مقصد فلسطینی پناہ گزین بچوں پراسرائیلی نصاب مسلط کرنا ہے۔ بیان میں کہاگیاہے کہ اسرائیل مقبوضہ یروشلم میں فلسطینی عوام کے حقوق اور موجودگی کو نشانہ بنا رہا ہے اور فلسطینی پناہ گزینوں کے مسئلے اور ان کی واپسی کے موروثی حق کو ختم کرنے کی کوشش کررہا ہے۔
