دشمن 100 جوہری تنصیبات کو نشانہ بنائے گا تو ہم ہزار تعمیر کرلیں گے، ایرانی صدر

تہران : ایرانی صدر مسعود پزشکیان نے کہاہے کہ اگر دشمن ایران کی 100 جوہری تنصیبات کو نشانہ بنائے گا تو ماہرین فوری طور پر ہزار نئی جوہری تنصیبات تعمیر کر لیں گے۔ دانشوروں اور ماہرین کے ساتھ ملاقات میں مسعود پزشکیان نے کہا کہ دشمن چاہتے ہیں کہ پابندیوں اور دھمکیوں کے ذریعے اپنے مطالبات منوالیں گے۔ لیکن ہم دباؤ کو خاطر میں لائے بغیر عوام پر بھروسہ کرکے اپنے مسائل حل کریں گے۔ ایرانی صدر نے امریکہ کے متضاد رویہ پر تنقید کرتے ہوئے کہا کہ امریکی صدر ایک طرف دعویٰ کرتے ہیں کہ وہ ایران سے مذاکرات کرنا چاہتے ہیں لیکن دوسری طرف سخت ترین پابندیاں عائد کردیتے ہیں۔ پزشکیان نے مزید کہا کہ ایسا نہیں ہے کہ اگر امریکہ ہم پر پابندیاں لگاتا ہے تو ہم کچھ نہیں کر سکتے۔ ہم قومی صلاحیتوں پر بھروسہ کرتے ہوئے ملک کو ترقی کی راہ پر گامزن رکھیں گے۔