شیلٹرز نہ ملے تو گذشتہ سال جیسے المناک مناظر رونما ہو سکتے ہیں، حماس ترجمان

غزہ : حماس کے ترجمان حازم قاسم نے خبردار کیا کہ اگر موسمی طوفان کے آغاز سے قبل شیلٹرز فراہم نہ کئے گئے تو گذشتہ سال جیسے المناک مناظر رونما ہو سکتے ہیں۔
حماس نے قابض اسرائیل پر الزام عائد کیا ہےکہ وہ غزہ کی پٹی میں جو ٹرک داخل ہونے دیتا ہے وہ مقدار او نوعیت دونوں اعتبار سے بنیادی انسانی ضروریات کے کم سے کم معیار کو بھی پورا نہیں کرتے جبکہ یہاں کے شہری بدترین انسانی تباہی کا سامنا کر رہے ہیں۔ حازم قاسم نے اپنے جاری کردہ بیان میں کہا کہ قابض اسرائیل جن ٹرکوں کو داخلے کی اجازت دیتا ہے ان میں سے زیادہ تر تجارتی شعبے کے لیے مخصوص ہوتے ہیں۔ انہوں نے کہا کہ موجودہ مراکز اور خیمے رہائش کے قابل نہیں اور نہ ہی سخت سردی کا مقابلہ کر سکتے ہیں۔ حازم قاسم نے متعلقہ ممالک اور ثالثوں سے مطالبہ کیا کہ وہ موسمی طوفانوں کے آغاز سے قبل شیلٹرز کی فوری اور سنجیدہ فراہمی یقینی بنائیں۔