اسرائیل نے غزہ میں دوبارہ جنگ چھیڑی تو ہم بھی حملے شروع کردیں گے، عبدالملک الحوثی

صنعا : یمنی مزاحمتی تنظیم انصار اللہ کے رہنما سید عبدالملک الحوثی نے خبردار کیا ہے کہ اگر اسرائیل نے غزہ میں دوبارہ جنگ چھیڑی تو ہم بھی حملے شروع کردیں گے۔ عبدالملک الحوثی نے قوم سے خطاب میں کہاکہ اسرائیلی دشمن غزہ کی پٹی میں واپس آتا ہے تو ہم اس کے خلاف فوری طور پر کشیدگی بڑھانے کے لیے تیار ہیں۔ انہوں نے خبردار کیا کہ خطے میں امریکی ایجنڈا تباہ کن ہے۔ امریکہ عرب اور اسلامی دنیا کو لالچ اور دباؤ کے ساتھ ہینڈل کرتا ہے۔ اس کا رویہ بغیر کسی رعایت کے ان تمام ممالک کو خطرے میں ڈال دیتا ہے۔ انہوں نے کہا کہ مکہ اور مدینہ پر غلبہ حاصل کرنا صیہونی منصوبے کا حصہ ہے، جسے مرحلہ وار منظم کیا جا رہا ہے۔ سید الحوثی نے کہا کہ امریکا وحشی، متکبر، اور اخلاقی طور پر دیوالیہ ہے۔ انتہائی لالچ میں مبتلا ہے۔ وہ قوموں کا ان کے حقوق اور آزادی کی پرواہ کیے بغیر استحصال کررہا ہے۔